АВД ХОЙЫ

I Созвездие Плеяды. кæс СТЪАЛЫТЫ ÆМÆ ÆРВОН ФÆЗЫНДТЫТЫ НÆМТТÆ II Стъалыгуппар Авд хойыл ис ахæм ирон таурæгъ: «Æмбырдтæ» (афтæ дæр ма сæ хонынц) цы стъалыты гуппар хонынц, уыдон кæддæр уыдысты авд хойы. Уыдонæй чи хуыздæр у, уый зæххыл ничи зыдта. Иухатт куы уыди, уæд усгуртæ сфæнд кодтой чызджыты бафæлварын. Се ‘ппæтæн дæр радтой æмхуызон куыст æмæ сын загътой: «Йæ куыст уæ раздæр чи фæуа, уый уыдзæн уæ хуыздæр.» Чызджытæ бавнæлдтой, кæрдгæ-хуыйгæ кæнынц æмæ æхсæвæрафон уыцы-иу сахат фесты сæ куыст. Афтæмæй куы нæ сбæрæг сæ хуыздæр, уæд сæ фæрсынц: — Уæдæ цы хуызы ис, хуыздæр уæ чи у, уымæн равзарæн. Уыдон загътой: — Иунæг Хуыцау зоны, хуыздæр æмæ нæ æвзæрдæр чи у, уый. Фæлæ авдæй æмсæр кæй стæм, уый тыххæй нæ цæрæнуат уæд арвыл, нæ фæлгонц нын уынæд адæм æмæ нæ рох ма кæнæд. Ноджы Хуыцауы уый бафæндæд, цæмæй немæ уой нæ сынтæджытæ. Хуыцау сын сæ фæндон сæххæст кодта æмæ сын арвыл бынат радта». Стъалыгуппар Авд хойы стъалыты нæмттæ сты: Уз, Заз, Цицыр, Зада, Гадæкк, Удыкк æмæ кæстæр Гæда (фыдуаг æмæ къæбæда, æдзухдæр иуварс вæййы, иннæтимæ нæ хæццæ кæны). Иннæ варианты та сты: Аззæ, Уырыззæ, Цицц, Уæрдахъ, Дæдæкк, Уæдæкк æмæ Къæбæда. Ис сыл хъазгæмхасæн ахæм тагъддзурæн: … Бынтон — æнафон, Æнæнтыст фæуой, Цъæх арвыл кафынц, Цъæх арвыл симынц Æнæнтыст хотæ, Кæсут-ма, авдæй. Аззæ — сæ хистæр, Гъе стæй — Уырыззæ. Уымæй дæлæмæ — Цицц æмæ Уæрдахъ, Дæдæкк æмæ Уæдæкк, Стæй сæ кæстæр — Къæбæда. кæс «АРВЫ ДУАР»-Ы СÆРГÆНДТÆ